Col 3 | KMU | STEP | Anumaya KotiꞋa KalaisiꞋene tamakaila ago alino hetilamateno haegafa tamahaimula ago tamamine. Tamamineafe tamakaya anafinagati alisaya yafe tamakesa havi havi hutama maiho. Anafinaga YisasiꞋa Anumaya Kotina tamaga ayatega hanea siale maine.

Colossians 3

Tagaya KalaisiꞋene ago eteta heti-mainone.

1 Anumaya KotiꞋa KalaisiꞋene tamakaila ago alino hetilamateno haegafa tamahaimula ago tamamine. Tamamineafe tamakaya anafinagati alisaya yafe tamakesa havi havi hutama maiho. Anafinaga YisasiꞋa Anumaya Kotina tamaga ayatega hanea siale maine. 2 Maineafe mukiꞋa kanafina tamakaya anafinaga yafekeꞋya tamakesa havi havi hutama mainetama ma mopafi yafena tamakesa ohaviho. 3 Tamakaya kefo yama nehaya atafa tamaipa ago falitegeno kanaleꞋya hutama maisaya yatamia ago falakino KalaisiꞋene aigaꞋmae-maineanagino Anumaya Kotipi hane. 4 Hanegeno KalaisiꞋa tamahaimuꞋmo aepaꞋa fufuteꞋma evaꞋyi hisigetama tamakaiꞋene tokiya hale yamaꞋafi umaigahae.

Nayona yana ago ataleta menia haegafa veaꞋne mainone.

5 TokiyaꞋage hale yamaꞋafi umaisaya yafe ma mopafi kefo yama nehaya yaꞋyaga hamaetama haꞋno hiho. MaꞋa auꞋavafe nehue munaꞋnene aꞋnene kumai he yane. TamaugafamoꞋa oniꞋyaꞋage nehia kefo yane. Augafa haga neyane. Age lamahaꞋye nehaya yane. Alu kanomo yate age lamahaꞋye nehaya yamoꞋa ago fali-mainaya veaꞋmogamife “Anumayati maine.” huꞋya amakisana vaiꞋya amaku amisaya avamete huno Anumaya Kotina amaku oꞋaminaya avamete kava nehie. 6 MukiꞋa ani kavaꞋma nehaya veaꞋmogamina Anumaya KotiꞋa aipamoꞋa haviya nehianagino haivaimateno anonaꞋamia amakata aisia yana amamigahie. 7 Hagotetama tamakaiꞋenena ani veaꞋnene vaiyatete nehutama ani kavala hu-mainagi menia mukiꞋa ani kavala ataleho. Kema vaiyane. Tamaipafiti anumayayamo hai yane. Vaya havita haviya humatesaya yane. VeaꞋmogamife kamuge hatagetama vaimate yane. Age lamahaꞋye nehaya yamo avagema nehaya kea ataleho. 9 Tamakaya atafa kenama asagitama hagaꞋyu hutalaya avamete hutama atafa lamaipaene humainaya yaꞋenena ago atalenagi nelamafu-gamifena havigema ayemavataga nehaya kea ataleho. 10 Tamakaya yaufa kenama alitama nefaiya avamete hutama haegafa tamaku tamakesale ago mainageno Anumaya KotiꞋa mukiꞋa kanafina agaiꞋa auꞋava yana tamave-ligetama havitetama ani haegafa lamaku tamakesamoꞋa nagoꞋene haegafa veaꞋne kana hutama Anumaya Koti mainea avamete hutama mainetama Anumaya Kotifena havilama hugahae. 11 Ani haegafa vayala mainetama mukiꞋa veala nagoke avamete mainone Yuta veaꞋnene Yuta vea omainaya veaꞋnene, amaugafa laga hu-malenaya vayaꞋene taga ohunaya vayaꞋene haesa veaꞋnene anupa veaꞋnene nofipi aliꞋya neꞋaliya veaꞋnene afaꞋa maineꞋya miya neꞋaliya veaꞋnene nago avamete mainageno KalaisiꞋa agaiꞋa hagote kanoꞋamia kasagoꞋya veaꞋmogami amakupina maine.

VeaꞋmogamife aluya huno lahaisia auꞋava yana alisune.

12 Tamakaila Anumaya KotiꞋa hapali-lamatenea veala agaila alu aotage veaꞋneꞋa mainageno tamakaifena hau ayamopafi nehaiya veaꞋne mainaya yafe kenama alitama nefaiya avamete hutama maꞋa kanale kavala failiho. MukiꞋa veafe tamahau humatetama kayone humateho. Tamaugafa alitama ohaiho. Alu kanomo kema havisayana ako hutama kea oꞋamakiho. Tamamena mailava hutama maiho. 13 Tamakai amuꞋnopima mainesia kanomoꞋa nefufena havigema hutesigenofena amena malelava huno maineno aigeꞋateno kefo yamaꞋa ataletesie. AnumayatimoꞋa kefo yatamia ago aigetamateno atalelamateneafe tamakaya aniꞋa hutama ani kavakeꞋya hiho. 14 Tamahau tamayamopafima nelamahaiya yamoꞋa mukiꞋa mani kanale kavaꞋmona agaseno ala humaine. Kenatimona atafa hisia tamuꞋnofiꞋma kitama atalakoma huna avamete huno tahau tayamopafima nelahaiya yana aniꞋa huno mukiꞋa mani kanale kavala haꞋyagino hetofa huligahie. 15 KalaisiꞋa tamaipa falu hisia yana tamamineanagino kava hulamatesigetama keꞋa haviho. Nagoke tamaipale maisaya yafe Anumaya KotiꞋa tamakaifena ke higetama ageno “Nagai naugafa nagoke mainae.” huno humaine. MukiꞋa yafena mukiꞋa kanafina Anumaya Kotitega muse huteho. 16 Kalaisi humainea kea tusiꞋa kanale kegi tamakuꞋafina tokiyaꞋage huno haneno. Mani kea nelamafuꞋya kefo yama hisagetama kanale havi haviꞋyatamileti hamapaitama ali fatago humateho. TamakuꞋaleti yagamea hutama Anumaya Kotitega musena hutetama yagamefiti Anumaya Koti agia alisaga hiho. 17 MukiꞋama hisaya kavaꞋene kenema mukiꞋa ani yateti Anumayatimona Yisasi agia alisaga nehutama agaiꞋama hulatenea yafena Anumaya Kotitega musena hiho.

PoloꞋa Yisasi kema nehaviya alavene nafaꞋneyagaꞋamienefe humaine.

18 Tamakaya aꞋnemogatama anautamimogami kea akave maleho. NaꞋama hisaya yamoꞋa Anumayamo aufina fatago kava nehie. 19 Vemogatama aꞋnetamimo-gamifena tamahau tamayamopafi tamahaisigetama amaipa haviya hisia kea hu oꞋamateho.

20 NafaꞋnemogatama itatami-afotamimogami kea mukiꞋa havitama akave maleho. NaꞋama hisaya yafena AnumayamoꞋa aluya huno nehaiye. 21 Nefagatama nafaꞋnetamimoꞋya haviꞋya amakaye hisifa kea hu oꞋamateho. Humatesayana amaipa haviꞋya haviya hugahae.

PoloꞋa aliꞋya veaꞋnene kavaꞋamimofeꞋene humaine.

22 Nofipi mainetama miya oꞋali aliꞋya veaꞋmogatama* mopale mainaya kava vayatamimogami kea mukiꞋa havitama akave maleho. Havigu “Nagaifena ‘Kanale kano maine.’ huno hisie.” hutama kava kanomo aulekeꞋya aliꞋyana neꞋalitama havigu alulegama visaya kanafina oꞋalisagi aꞋao Anumayamofena koli nehutama tamakuꞋamoꞋa fatago hinagetama mukiꞋa kanafina aliꞋyatekeꞋya maiho. 23 MukiꞋa yama hisaya yana alitama tokiyaꞋage hutama aliho. “Ma mopafi afa vayaꞋmogami aliꞋyana noꞋalunagi Anumayatimo aliꞋya neꞋalune.” hutama aliho. 24 Tamakaya ago havimainae Anumaya KalaisiꞋa tamakaila kava kanotami maineanagino haenagaꞋa aliꞋyatamileti anonaꞋa tamamigahie. 25 Tamamigahigi veaꞋmoꞋya kefo yama nehisaya yatetila anonaꞋamia aligahae. AnumayamoꞋa mukiꞋa veaꞋmoꞋya humainesaya yateti nago avamete huno anonaꞋamia amamigahie.